Mat 23 | NdeIBE | STEP | UJesu wasesithi emaxukwini abantu lakubafundi bakhe:

Matthew 23

Izixwayiso Eziyisikhombisa

1 UJesu wasesithi emaxukwini abantu lakubafundi bakhe:

2 “Abafundisi bomthetho labaFarisi bahlezi esihlalweni sikaMosi. 3 Ngakho limele libalalele lenze konke abalitshela khona. Kodwa lingakwenzi abakwenzayo, ngokuba kabakulandeli lokho abakutshumayelayo.

4 Baqoqa imithwalo enzima bayetshathe emahlombe abantu kodwa bona bengafuni lokuthi thiki bayithwale.

5 “Konke abakwenzayo bakwenzela ukuba babonwe ngabantu: Benza imicwatsho yabo yemibhalo ibe banzi lezintshaka zezigqoko zabo zibe zinde; 6 bathanda izindawo eziphezulu emadilini lezihlalo eziqakathekileyo emasinagogeni,

7 bathanda ukubingelelwa emisikeni lokuthi abantu bababize ngokuthi ‘Rabi.’

8 “Kodwa lina malingabizwa kuthiwe ‘Rabi,’ ngokuba munye kuphela oyiNkosi yenu njalo lina lonke lingabafowenu. 9 Futhi lingabizi muntu emhlabeni ngokuthi ‘baba’, ngokuba lilo Yihlo oyedwa, yena osezulwini. 10 Njalo lingabizwa lithiwe ‘mfundisi,’ ngokuba liloMfundisi oyedwa, uKhristu.

11 Omkhulu kulani lonke phakathi kwenu uzakuba yinceku yenu.

12 Ngokuba lowo oziphakamisayo uzathotshiswa, lalowo ozithobayo uzaphakanyiswa.

13 “Maye, kini, bafundisi bomthetho lakubaFarisi, lina bazenzisi! Livalela abantu umbuso wezulu. Lina ngokwenu kalingeni liphinde livimbele labo abazama ukungena. ( 14 “Maye, kini bafundisi bomthetho lakini baFarisi lina bazenzisi! Liphanga izindlu zabafelokazi, beselizenzisa lisenza imikhuleko emide: ngalokho lizakwamukeliswa ukulahlwa okukhulu.)

15 “Maye, kini bafundisi bomthetho lakini baFarisi, lina bazenzisi! Lidabula ilizwe lihambe laphezu kolwandle lidinga ukuphendula oyedwa zwi, lithi selimzuzile limguqule abe yindodana yesihogweni okuphindwe kabili kulani.

16 “Maye kini, baholi abayiziphofu! Lithi, ‘Nxa umuntu efunga ngethempeli kakutsho lutho; kodwa nxa umuntu efunga ngegolide lethempeli usezibophile ngesifungo sakhe.

17 Lina ziphofundini! Yikuphi okukhulu kulokunye: igolide kumbe ithempeli elingcwelisa igolide? 18 Lithi njalo, ‘Uma umuntu efunga nge-alithare, akusilutho; kodwa uma umuntu efunga ngesipho esikulo usezibophile ngesifungo sakhe.’ 19 Lina ziphofu zabantu! Yikuphi okudlula okunye: isipho langabe ialithare elenza isipho sibe ngcwele? 20 Ngakho lowo ofunga nge-alithare ufunga ngalo langakho konke okukulo. 21 Njalo lowo ofunga ngethempeli ufunga ngalo njalo langaye lowo ohlala kulo. 22 Njalo lalowo ofunga ngezulu ufunga ngesihlalo sobukhosi langaye ohlezi phezu kwaso.

23 “Maye kini, bafundisi bomthetho lakini baFarisi, bazenzisi! Linika okwetshumi okweziyoliso zenu – iminti ledili lekhamini. Kodwa seliyekethisile kulezozinto eziyisiqokoqela somthetho – ukwenza okulungileyo kwabanye, umusa kanye lokwethembeka. Bekufanele lithi likwenza lokhu lingawuyekethisanga umthetho. 24 Lina baholi abayiziphofu! Liyacenga ukukhupha ubuyane kodwa lihubule ikamela.

25 “Maye kini, bafundisi bomthetho lakini baFarisi, lina bazenzisi! Lihlambulula ingaphandle yenkomitshi lomganu, kodwa phakathi zigcwele ubuhwaba lokuzisuthisa.

26 Siphofu soMfarisi! Qala uhlambulule ingaphakathi yenkomitshi lomganu, kuze kuthi ingaphandle layo ihlambuluke.

27 “Maye kini, bafundisi bomthetho lakini baFarisi, lina bazenzisi! Linjengamadlinza aconjiweyo ngekalaga, akhanya ebukeka ngaphandle kodwa ngaphakathi agcwele amathambo abantu abafileyo lakho konke okungcolileyo. 28 Kanjalo, ngaphandle libonakala ebantwini linjengabalungileyo kodwa ngaphakathi ligcwele ukuzenzisa lokungcola.

29 “Maye kini, bafundisi bomthetho lakini baFarisi, lina bazenzisi! Lakhela abaphrofethi amathuna njalo licecise amangcwaba abalungileyo. 30 Bese lisithi, ‘Ngabe saphila ngezinsuku zabokhokho bethu sasingeyikubaphathisa ekuchitheni igazi labaphrofethi.’ 31 Ngalokho yini elipha ubufakazi bokuthi liyisizukulwane salabo ababulala abaphrofethi. 32 Nanko-ke, velani liqedise lesosono sabokhokho benu!

33 “Lina zinyoka! Lina nkunkuma yezinhlangwana! Lizaphepha kanjani ukuba lilahlelwe esihogweni na?

34 Ngakho ngilithumela abaphrofethi lamadoda ahlakaniphileyo labafundisi. Abanye babo lizababulala libabethele; abanye lizababhaxula emasinagogeni enu lilandelelane labo kuleli laleliyana idolobho. 35 Ngakho-ke lonke igazi elilungileyo elachithwayo emhlabeni kusukela egazini lika-Abela owayelungile kusiya egazini likaZekhariya indodana kaBherekhiya elambulala phakathi laphakathi kwethempeli lealithare lizakwehliselwa phezu kwenu.

36 Ngilitshela iqiniso, konke lokhu kuzakuba phezu kwalesi isizukulwane.

37 “Hawu Jerusalema, wena obulala abaphrofethi ubakhande ngamatshe labo abathunywe kuwe, sekukanengi ngilangazela ukuqoqa ndawonye abantwaba-kho, njengesikhukhukazi siqoqa amatshiyane aso ngaphansi kwamaphiko aso, kodwa wena wawungathandi. 38 Bona-ke indlu yakho isisele isikhala ibhungane. 39 Phela ngiyalitshela ukuthi kaliseyikuphinde lingibone futhi lize lithi, ‘Ubusisiwe lowo oza ngebizo leNkosi.’ ”